Estimadxs compañeirxs,
Nestes dous últimos anos temos contactado con vós para convidarvos a participar no Encontro das Industrias Creativas ZINC SHOWER en Madrid, co respaldo da Dirección Xeral de Traballo e Economía Social, baixo unha marca-paraugas que demos en chamar GALICIA ECONOMÍA SOCIAL CREATIVA.
Despois das conversas mantidas individualmente con cada un de vós neses contactos, e de que todxs nos trasladásedes a necesidade de construírmos algo xuntos, decidimos impulsar GALICIA ECONOMÍA SOCIAL CREATIVA como unha rede de traballo para as empresas de economía social galegas (cooperativas, cooperativas sen ánimo de lucro e sociedades laborais) que nos axude a coñecernos, intercooperar, compartir servizos, experiencias, ideas e proxectos; e tamén para saír fora de Galicia, formarnos, solicitar axudas… e facelo sempre desde a perspectiva da creatividade, entendida no seu sentido máis amplo e aplicada a calquera sector, co fin de converter GALICIA ECONOMÍA SOCIAL CREATIVA nun verdadeiro motor de innovación social. Contamos co visto e prace da Dirección Xeral de Traballo e Economía Social pero pretendemos constituírnos como unha plataforma autónoma e libre en todas as nosas accións e decisións.
|
O mércores 23 de setembro ás 16:30, estaremos na Casa das Campás de Pontevedra, dentro das Xornadas de Emprendemento do PONT-UP STORE, presentando a rede de traballo GALICIA ECONOMÍA SOCIAL CREATIVA. No adxunto atoparedes un primeiro documento fundacional que queremos seguir construíndo coa participación de todas e todos vós.
|